မန္တလေးတိုင်းဒေသကြီးအစိုးရအဖွဲ့သတင်းထုတ်ပြန်ရေး ၀က်ဘ်ဆိုက် ထုတ်လွှင့်မည်

    မန္တလေးတိုင်းဒေသကြီးအစိုးရအဖွဲ့၏ လုပ်ငန်းဆောင်ရွက်ချက်များကို အများ ပြည်သူများသိရှိစေရန် သတင်းထုတ်ပြန်ရေးဝက်ဘ်ဆိုက်အား ဇူလိုင်လဆန်းတွင် ထုတ် လွှင့်ပေးနိုင်ရန် ပြင်ဆင်လျက်ရှိသည်။ ၀က်ဘ်ဆိုက်တွင် တိုင်းဒေသကြီးဝန်ကြီးဌာန သတင်းများ၊ မန္တလေးတိုင်းဒေသကြီးအတွင်း ဖြစ်ပေါ်နေသော သတင်းအချက်အလက် များ၊ သတင်းထုတ်ပြန်ချက်များ၊ စီးပွားရေး၊ လူမှုရေး၊ ပညာရေး၊ ကျန်းမာရေးဆိုင်ရာအသိပေးချက်များ၊ ယာဉ်စည်းကမ်းထိန်းသိမ်းရေးဆိုင်ရာအချက် များ ပါဝင်မည်ဖြစ်သည်။

        မန္တလေးတိုင်းဒေသကြီးသတင်းဝက်ဘ်ဆိုက်အား ဇွန်၁၈ရက်မှစတင်ကာ စမ်းသပ်လွှင့်တင်ထားကြောင်း လက်ရှိအချိန်တွင် သတင်းများမှာ Up to Date မဖြစ်သေးကြောင်း၊ တိုင်းဒေသကြီးဝန်ကြီးဌာနများမှ သတင်းအချက်အလက်များ ပေးပို့မှု အားနည်းနေသေးကြောင်း၊ လွှင့်တင်လိုသည့် သတင်းများအား Zawgyi Fornt ဖြင့် ရိုက်ပြီး စီဒီခွေ ဖြင့်ကူးကာ အစိုးရအဖွဲ့ရုံးသို့ ပေးပို့ရမည်ဖြစ်ကြောင်း တိုင်းဒေသကြီးပြန်ကြားရေး နှင့် ပြည်သူ့ဆက်ဆံရေးဦးစီးဌာနမှ တာဝန်ရှိသူတစ်ဦးကပြောသည်။ သတင်းဝက်ဘ်ဆိုက် လိပ်စာမှာ www.mdyregion.gov.mm ဖြစ်သည်။

မန္တလေးမြို့တွင် အခြားဒေသလိပ်စာဖြင့် ယာဉ်များ ၀င်ရောက်မှုများပြား နေရပ်လိပ်စာ မှန်ကန်စေရေး ခရီးလွန်ယာဉ် စစ်ဆေးခြင်း မပြု

ကုန်းလမ်းပို့ဆောင်ရေးညွှန်ကြားမှုဦးစီးဌာန၊ မန္တလေးတိုင်းဒေသကြီးရုံးရှိ ခရိုင်ရုံး (တောင်ပိုင်းခရိုင်) နှင့် (မြောက်ပိုင်းခရိုင်ရုံး)များတွင် အခြားဒေသလိပ်စာဖြင့် မှတ်ပုံ တင်ထားသော မော်တော်ယာဉ်များအား ယခင်က ခရီးလွန်ယာဉ်စစ်ဆေးခြင်း ဆောင် ရွက်ပေးလျက်ရှိရာ ယခုအခါ မန္တလေးမြို့တွင် မော်တော်ယာဉ်များပြားလာခြင်း၊ အခြား ဒေသလိပ်စာဖြင့် မှတ်ပုံတင်ထားသည့်ယာဉ်များ ၀င်ရောက်မှုများပြားလာခြင်းတို့ကြောင့်  ယာဉ်ကြောပိတ်ဆို့မှုလျော့နည်းစေရေး၊ နေရပ်လိပ်စာမှန်ကန်စေရေးတို့အတွက် ဌာနဆိုင်ရာယာဉ်များမှအပ ကျန်ပုဂ္ဂလိကယာဉ်များအား မန္တလေးတိုင်းဒေသကြီးခရိုင်ရုံး (တောင်ပိုင်း/မြောက်ပိုင်း) ရုံးများတွင် ၂၀၁၄ခုနှစ်ဇူလိုင်(၁)ရက်မှစတင်၍ အခြားဒေသ မှတ်ပုံတင်ထားသော ယာဉ်များအား ခရီးလွန်စစ်ဆေးခြင်းအားဆောင်ရွက်ပေးမည် မဟုတ်ကြောင်း မန္တလေးတိုင်းဒေသကြီး ကုန်းလမ်းပို့ဆောင်ရေးညွှန်ကြားမှုဦးစီးဌာနက အသိပေးထား သည်။

        ရန်ကုန်မြို့ နှင့် မန္တလေးမြို့မှလွဲ၍ ကျန်တိုင်းဒေသကြီး၊ ပြည်နယ်၊ ခရိုင်ရုံးများတွင် ခရီးလွန်စစ်ဆေးခြင်းကို ဆက်လက်ဆောင်ရွက်ပေးမည် ဖြစ်သည်။

ဆေးတက္ကသိုလ် နောက်ဆုံးနှစ် ကျောင်းသားကျောင်းသူများ ကျန်းမာရေးအသိပညာပေး ဟောပြော

  ကျန်းမာရေးဝန်ကြီးဌာန၏ ရည်မှန်းချက်များနှင့်အညီ အကောင်အထည်ဖော် ဆောင်ရွက်နိုင်ရေးအတွက် ဆေးတက္ကသိုလ်(မန္တလေး)မှ နောက်ဆုံးနှစ်အပိုင်း(က)မှ ကျောင်းသားကျောင်းသူ(၉၆)ဦးတို့သည် ကာကွယ်ရေး နှင့် လူမှုရေးဆေးပညာဌာန စီစဉ်မှုဖြင့် ဇွန်(၂၇)ရက် နံနက်(၉)နာရီက မန္တလေးမြို့ ချမ်းမြသာစည်မြို့နယ် အမှတ်(၃၁) အခြေခံပညာအထက်တန်းကျောင်းတွင် ကျန်းမာရေးပညာပေး ဟောပြောပွဲကို ကျင်းပသည်။

        ဆေးတက္ကသိုလ်(မန္တလေး) နောက်ဆုံးနှစ် ကျောင်းသားကျောင်းသူများက အမှတ်(၃၁)မှ ကျောင်းသားကျောင်းသူ ကလေးများအား တစ်ကိုယ်ရေသန့်ရှင်းရေး နှင့်  မိုးရာသီတွင် အဖြစ်များသော သွေးလွန်တုပ်ကွေးရောဂါ ကြိုတင်ကာကွယ်ရေးဆိုင်ရာ သိကောင်းစရာများကို ပညာပေးဟောပြောပေးခဲ့သည်။

ငါးမန်း လောင်းကစားဂိမ်းစက်များ တရားမ၀င်တင်သွင်း ပို့ကုန်/သွင်းကုန်ပုဒ်မ(၈)ဖြင့် ထပ်မံ အရေးယူ

          မန္တလေးခရိုင် ချမ်းမြသာစည်မြို့နယ် ကန်သာယာရပ်ကွက်(ဗ၃/၅)ရှိ ကျော်ထွန်း (၂၄)နှစ်ထွန်းတုံးရပ်ကွက်၊ ချမ်းမြသာစည်မြို့နယ်နေသူ၏ ငါးမန်းဂိမ်းဆိုင်အား မေ(၃၀)ရက်က တိုင်းရဲအကူတပ်ဖွဲ့ခွဲ(မှု/ကူ)မှ ဒုရဲအုပ်စိုးစိုးနှင့်အဖွဲ့ အောင်ပင်လယ်နယ်မြေရဲစခန်းမှ ဒုရဲအုပ်ဇေယျာဝင်းနှင့်အဖွဲ့သည် သက်သေများနှင့်အတူ သတင်းအရ ၀င်ရောက်ရှာဖွေရာ ငါးမန်းလောင်းကစား ဂိမ်းထောင်ပြီး ဒိုင်အဖြစ် ပြုလုပ်သူ ကျော်ထွန်း၊ စာရေးမမိုးမြတ်သူဇာ၊ ငါးမန်းဂိမ်း လာရောက်ကစားသူ ကျော်စိုးမိုးပါ (၉)ဦးတို့အား ငါးမန်းလောင်းကစားစက်(၃)လုံး၊ လောင်းကြေးငွေ (၁၃၆၅၅၀၀)ကျပ်၊ လောင်းကစားသူများ စီးလာသည့် ဆိုင်ကယ် (၈)စီးနှင့်အတူ ဖမ်းမိသဖြင့် ကျော်ထွန်းပါ (၁၁)ဦးအား အောင်ပင်လယ်နယ်မြေရဲစခန်းက (ပ)၂၄၅/၂၀၁၄ လောင်းကစားပုဒ်မ၁၃(က)၊ ၁၄(က)အရ အမှုဖွင့်အရေးယူထားသည်။

        အမှုမှ သိမ်းဆည်းရမိသော ငါးမန်းလောင်းကစားစက်များသည် တရုတ်နိုင်ငံမှ တရားမ၀င်အကောက်ခွန်မဲ့ တင်သွင်းလာကြောင်း စစ်ဆေးသိရှိရသဖြင့် ကျော်ထွန်းအား ဇွန်(၂၄)ရက်တွင် အောင်ပင်လယ်နယ်မြေရဲစခန်းက (ပ)၂၈၀/၂၀၁၄ပို့ကုန်/သွင်းကုန် ပုဒ်မ (၈)အရ ထပ်မံအမှုဖွင့် အရေးယူထားကြောင်း သိရသည်။

နွားပွဲဈေးတွင် ငွေစက္ကူအတုများဖြင့် နွားဝယ်ယူမှု စစ်ဆေးတွေ့ရှိ စုံစမ်းစစ်ဆေးလျက်ရှိ

  မန္တလေးတိုင်းဒေသကြီး ၀မ်းတွင်းမြို့နယ်ရိုးရွာနေ ကိုမျိုးသင်း(၃၀)နှစ်သည် ဇွန်(၂၄)ရက် မွန်းတည့်(၁၂)နာရီက သာစည်မြို့နွားပွဲဈေး၌ ၎င်းပိုင်နွားထီး၁ကောင်အား ရောင်းချခဲ့ရာ အသက်(၅၅)နှစ်ခန့် အမျိုးသားတစ်ဦးမှ ကျပ်(၅)သိန်းဖြင့် ၀ယ်ယူခဲ့ပြီး (၅၀၀၀)ကျပ်တန် (၁၀၀)ရွက်ပေးခဲ့သည်။

နွားပွဲဈေးတာဝန်ခံအား ပွဲခကျပ်(၅၀၀၀)တန် (၁)ရွက်ပေး ခဲ့သည်။ ဇွန်(၂၅)ရက် ညနေ(၄)နာရီတွင် ကိုမျိုးသင်းသည် တစ်ရွာတည်းနေ ဦးလေးဖြစ်သူ ဦးညွန့်လှ(၅၀)နှစ် တောင်သူအား အဆိုပါ ငွေများအနက် ကျပ်နှစ်သိန်း (ကျပ်၅၀၀၀တန် ၄၀ရွက်)ပေးခဲ့ရာ ဦးညွန့်လှမှ နွားဖိုးငွေအဖြစ် ကိုနိုင်ဝင်း(၃၅)နှစ် တောင်သူအား ဆက်လက်ပေးရာ ကိုနိုင်ဝင်းမှ ကျပ်(၅၀၀၀)တန် ငွေစက္ကူများမှာ အရောင်များကွဲနေ၍ အတုများဖြစ်နိုင်ကြောင်းပြောသဖြင့် ကျေးရွာအုပ်ချုပ်ရေးမှူး မှတစ်ဆင့် နွားရောင်းရငွေကျပ်(၅၀၀၀)တန် (၉၉)ရွက်အား ၀မ်းတွင်းမြို့မရဲစခန်းသို့ သွားရောက်အပ်နှံခဲ့သည်။

   ၀မ်းတွင်းမြို့မရဲစခန်းမှတစ်ဆင့် အမှတ်(၃)မှုခင်းတပ်ဖွဲ့ခွဲ(မန္တလေး)သို့ ဆက် သွယ်အကြောင်းကြားသဖြင့် ဒုရဲမှူးမောင်မောင်အောင်နှင့်အဖွဲ့ ရောက်ရှိလာပြီး စစ်ဆေးရာ ငွေစက္ကူ(၉၉)ရွက်အနက် (၄)ရွက်မှာ အစစ်ဖြစ်ပြီး (၉၅)ရွက်မှာ ဆေးသားအရောင်မှေးမှိန်၍ စက္ကူအရောင်မှာ အနည်းငယ်ဝါပြီး အနည်းငယ်ထူကြောင်းတွေ့ရှိရသည်။ ငွေစက္ကူအတုဟု ယူဆရသော ငွေစက္ကူများ၏ နံပါတ်များမှာ တူညီမှုမရှိကြောင်း၊ ငွေစက္ကူအစစ်ကဲ့သို့ လှိူဝှက်ချက်များမပါရှိကြောင်း သိရသည်။